قال وانا بعدي كده على موقع صحيفة المصريون ودا مش من عادتي طبعا أكيد
لقيت موضوع بعنوان [ تفاوت ردود فعل نجوم هوليوود حول الصراع العربي الإسرائيلي ] قلت ادخل اقراه ودا مش
من عادتي برضو
بس الفضول غلبني و حبيت اشوف مين قال ايه في ايه وعلشان ايه وليه
المهم استجمعت قوايا و ابتدأت قراية
لقيت شوية آراء تفتح النفس يعني المحترم محترم برضو
خلونا نشوف ( ال باتشينو:) “انظروا إلى تاريخ إسرائيل وستعرفون من هو الإرهابي؟”..
يسلم لسانه الراجل عنده عقل وبيفكر مش زي ناس اكيد طبعا مش The Godfather ( عجبتني جدفاذر دي )
رالف فاينز بقى قال “أشعر أننا نعيش في غابة حيث يأكل القوي الضعيف ونحن لسنا أفضل من العرب كي نحتقرهم”.
محترم يا بني طبعا ليك حق اصل مافيش احقر منكم مع كامل احترامي يعني اصلي بحب فيلم The English Patient
و أكد عملاق السينما الأمريكية داستين هوفمان “أن البشرية أخذت في الانقراض منذ تأسست دولة إسرائيل”.
شوفوا الناس الي فاهمة مش بتقول اي كلام في رغيف
أما النجم آنتوني هوبكنز فقال “إسرائيل تعني الحرب والدمار ونحن كأمريكيين للأسف نقف خلفها لذلك أشعر
بالخجل من كوني أمريكيا”.
طبعا لازم تشعر بالخجل انا بقى يشعر بالخجل من موقفنا الصامت والمتخاذل ( صامت ومتخاذل أيه الكلام الكبريدا يا عم ) بس بحب فيلم The Silence of the Lambsكنت مبدع الصراحة فناااااااااان
ومن جانبها أجابت النجمة ساندرا بولوك على سؤال حول رأيها فيما يجري , فقالت “أنا لست متابعة جيدة لأخبار
الحرب لكنني أتمنى وقف العنف”.
فن التثبيت عامل مفعول معاها مع ان وحياة بابا شكلها مش عارفة الألف من كوز الدرة
واتفق معها النجم الأسمر ويل سميث قائلا : “إن كلا الجانبين الإسرائيلي والفلسطيني على خطأ في إشعال
الحرب وعليهما وقف القتال فورا”.
ياراجل قول كلام غير ده يعني موقفك سلبي اوي انت شايف ان الفلسطينيين بيقاتلوا يا حسرة هم حليتهم ايه
يعني طيب دا انا كنت هقول اننا محتاجين بطل خارق زي الي في فيلم Hancock بس خلاص غيرت رأيي كلامك
مش حلو اوي طلعت زي الصرصار المعفن الي في men in black
وجاء تعليق نجم هوليوود المخضرم جورج كلوني ناريا , حيث قال “إن بوش وبلير ورايس أسماء سوف يتبرأ منها التاريخ”
نعم القول هذا ( مين نعم دي ؟ ) ايه الحلاوة دي يا جورج من يومك كده فنان افحمتني ( واخدين بالكوا من
افحمتني دي ) يا بني
, ونفس الكلام وافقت عليه آنجلينا جولي قائلة : “إن العرب والمسلمين ليسوا إرهابيين ويجب على العالم كشف
حقيقة إسرائيل”.
بصي انا ابتدأت احبك روحي يا شيخة يارب تخلفي اربع توائم المرة الجاية
وتساءل النجم شون كونري , قائلا : “بما أن الغرب يساند إسرائيل لأنه في مركز قوة , فماذا لو كنا في مركز ضعف؟”.
اكيد هتاخدوا على قفاكم وهي دي محتاجة سؤال اسرائيل اول واحدة كانت هتديكم بالشبشب وابقى قابلني لو
حد عبركم
أما ميل جيبسون المعروف بمواقفه الجريئة وصداماته مع اليهود منذ فيلمه (آلام المسيح) فعلق قائلا : “الصهاينة
هم منبع الدمارفي العالم وأتمنى لو بإمكاني محاربتهم كالجنود”
انا طول عمري بحبك انت راجل عندك وجهة نظر محترمة مش زي الرعاع التانيين
دي كانت شوية آراء تفتح النفس تعالوا بقى أوريكم شوية آراء تخليكم تتفوا على صحابها
هاريسون فورد مثلا الذي ترجع جذوره إلى أصول يهودية “بأن العرب مخلوقات أشبه بالحيوانات واليهود شعب الله
المختار وليس ثمة مقارنة “
حثالة المجتمع وطفلة الحشرة وحمار آه والله دا بني آدم زبالة و عايز الدبح هيولع في جهنم الحمرا ان شاء الله
علق النجم كيانو ريفز الشهير بماتريكس , قائلا “أنه لو كان العرب أقوياء بما يكفي لشملت سيطرتهم العالم بأسره
وبما أنهم ضعفاء فينبغي أن ندمرهم تماما”
واطي انت يا مان انت تستاهل صاروخين في نفوخك يارب الماتريكس تاخدك ونستريح منك
وصادق النجم توم كروز على وجهة النظر ذاتها , قائلا: “العرب هم مصدر الإرهاب في العالم فهم يهاجمون الجميع
بلا استثناء. أتمنى أن تقضي إسرائيل عليهم”.
اتفوخص عليك ولا تسوى زبالة من يومك تستاهل ان طليقتك ( نيكول كيدمان ) تسيبك يامعفن
وافقهم في الرأي الممثل الشهير ريتشارد جير حيث ذكر “أن العرب شر في هذا العالم ويجب إبادتهم”
دا بقى ليه عين يتكلم صحيح الي اختشوا ماتوا انت مالك ومال السياسة خليك انت في سبسبة شعرك
انا بقى يمكن أكون زعلت واتدايقت ودمي اتحرق بس رجعت فكرت تاني ولقيت اني مش كويس عليا احرق دمي
و اعلي ضغطي و ارفع السكر وانا لسه في عز شبابي يا عيني عليا ( عشان حجات تعيش حجات كتير لازم
تموت ) عظيمة طول عمرك ياست بس انتي ايه الي جابك هنا ؟؟ ماعلينا .. ولا علينا ؟؟؟
بعد بقى وقفة طويلة مع نفسي قررت اني مش هينفع ماتفرجش على mbc2 , foxmovies , mbc max وباقي
القنوات دي الي بتغرقنا أفلام اجنبي وجه على دماغي على طول مادة التيارات الفكرية وموضوع الهيمنة
الأمريكية على وسائل الإعلام وانها بتعملنا غسيل مخ بس الي عايزة أعرفه اوي هم بيستعملوا مسحوق ايه في
الغسيل تايد ولا اريال ولا برسيل أصل غسيلهم نضيف وأبيض زي القشطة يبقى أكيد بيستخدموا كلوركس أو
فانيش ولا بيستخدموا بونكس تلاتة في واحد ( نظافة ريحة وتوفير ) ؟؟؟
بس طبعا لو انا ماعملتش حاجة فده اقتداء بالست أمي مصر
يعني هي على راسها ريشة وانا بنت البطة السودا ؟؟ اكيد لا
وذلك بما اننا نحيا ونستنشق الهواء الملوث زي عبده تلوث كده
حد في الدنيا ياكل من محل اسمه عبده تلوث ربنا يديكم الصحة نازلين زي المنشار مش عاتقين
بس في بلد في الدنيا بذمتكم فيها محل اسمه كده غير مصر أم العجايب
عظيمة يا مصر يا أرض اللوز
محدثتكم من فوق الكنبة ( ثعاد ) ذبد الذبادي
اترك تعليقاً