خلاص خلصت الامتحانات الي أقل وصف ليها انها كانت طلصأة << ( هي مكتوبة كده صح ؟؟) انا بحب تخصصي اه بس مش بحب البيروقراطية وروح العداء اللي بين بعض الدكاترة المعقدين وبيننا فاكرين اننا داخلين معاهم حرب مع انها حرب غير متكافئة اطلااااقا
يارب كل الدكاترة المضلمين من جواهم يا تهديهم يا تهدهم
وربنا يكرم الدكاترة المخلصين واللي عايزين يعلمونا بجد لأنهم فعلا يستاهلوا كل التقدير والاحترام ويستاهلوا ندعي لهم ونفتكرهم بالخير دايما حتى بعد ما نتخرج ان شاء الله
زي النهارده كده الاسبوع الي فات كان اخر يوم مكانش يوم وحش والله كان يوم حلو كان عيد ميلاد 3 من صحباتي الجمال اوي ساسو الشعنونة وجيسي العسل وسومة البنوتة حبيبة قلبي صديقتي واختي وحبيبتي وروح قلبي ربنا يخليها ليا ويديم صداقتنا ويخليلي باقي صحابي يارب … والجو كان برررررررررررررررد اوي اليومين الي فاتوا ورغم ذلك كنت بنزل من بيتنا بلبس خفيف اوي >> مفيش أي نوع من الاحساس ( يمكن علشان بحب البرد اوي ) ؟؟
ويوم السبت كمان كان يوم مهم اوي علشان بسومة صديقتي نزلت كتابها ( كلاب الشوارع ) وكان حفل التوقيع في معرض الكتاب وبسومة بقى كانت عاملة فيها عم المهم << بس هي تستحق بصراحة ربنا يوفقها ونشوف اصدارات جديدة ليها على طول ان شاء الله دايما
وبمناسبة المعرض انا نفسي اعرف الناس الي رايحة وواخدة محشي وأكل وواخدين لعيالهم كور يلعبوا بيها ايه هدفهم بالظبط من روحة المعرض << غتاتة ولا تلامة ولا فسحة وخلاص .. انا اعرف ناس هتموت وتروح المعرض علشان تشتري كتب وتقراها لكن الناس الي بتروح علشان تاكل المحشي دي معاهم ربنا ياعيني مش لاقيين حته في بيتهم ياكلوا فيها << ربنا يشفي أو يهدي
خلصت الامتحانات واخدنا الاجازة كان بقالي كتير اوي مستنياها .. بس ماينفعش اقول اني مبسوطة بيها علشان فعلا مش مبسوطة خاااااالص بيها حاسة اني لو كملت كده لاسبوع كمان هيجيلي اكتئاب << وأغني ظلموه
ويمضي اليوم بعد اليوم بعد اليوم …. ونقول هيخلص الاسبوع بعد يوم
ويجي بكرة ويجي بعده ومفيش أمل لازم نعيش غصب عننا في كل اسبوع 7 يوم
الله عليكي يا فنانة <<<< طول عمري بشعر ياخسارتي في البلد دي يا خسارة
حتى القصص الي بكتبها حاولت اكملها تفكيري توقف تماما وماعرفتش اكتب فيها كلمة جديدة << ربنا يستر ويعدي الاسبوع الي فاضل ده على خير … علشان ما اقلبش على اتخنقت مش ذنب الناس اعذبها معايا بصوتي الحلو … ( يارب )
على الهامش : قلبت من إليسا أواخر الشتا لمحمد منير برة الشبابيك
اترك تعليقاً