أيام الانطحانات

بما إني بقالي كتير أوي جدا خالص ماكتبتش حاجة لا في المدونة دي ولا في المدونات التانية بتاعتي والي هكتبه النهارده يعتبر تاني تدوينة أكتبها هنا فـ أنا هرغي شويتين بمناسبة الامتحانات الي هجمت على معظم الناس علشان تتغدى بيهم وبعدين هتحلي بينا احنا 4 آداب إعلام الناس الي وقعت من قعر القفة الناس ولاد البطة السودة والخضرا والحمرا وماعلينا من المسميات لكن أصل بصراحة الجدول غريب عجيب مزنوق و تقريبا كده ملقاش مكان يستريح فيه غير عندنا هنمتحن في اسبوع 🙁 ربنا قادر يشيل من هنا ويحط هنا طب أدعي عليهم بـ إيه وهم فيهم كل العبر … يارب قادر على كل شيء يارب

أيام الانطحانات ….
النوم بيحلى ، الكمبيوتر بيحلى ، التدوين بيحلى ، التليفزيون بيحلى ، الشوكولاتة بتحلى ، البيبسي بيحلى ، الهارديز بيحلى ، الشيبسي بيحلى

القراءة في كل حاجة ما عدا كتب الكلية المؤكسدة بتحلى ، الخروج بيحلى ، السفر الي لسه راجعين منه بيحلى ، وبالنسبة للبنوتات الميك اب بيحلى ، الموسيقى والأغاني بتحلى … وبالمناسبة البوم اليسا الجديد كان حلو بصراحة حلو أوي

بيستحي لما بسمعها أد ما ببتسم إن لسه في ولد اليومين دول كده ؟؟؟ أد ما بستمتع أوي بيها

امري لربي اغنية كلماتها عاجباني لكن متهيألي كان اللحن ممكن يبقى غير ده بس مقبولة

سلملي عليه تقليد لأغنية فيروز آه بس بترجعني لايام زمان ودا شيء جميل

ما عاش ولا كان لذيذه أوي والرتم بتاعها حلو

متعرفش ليه جميله بس ومحتاجة حد احساسه عالي علشان يفمهما ويحسها اوي

مصدومة غريبة ، قاسية ، تعيشك فعلا احساس الصدمة

تصدق بمين تحفففففففففففففففففة

وعيشة والسلام خطيرة بكلا المعنيين الي بتحملهم الكلمة

كمان عاجبني مطربة اسمها أمنية سليمان اغنيتها الاولانيه الحب بيجي في ثانية وأغنية مش هوه وبتحنلي صوت يتسمع بجد .

وكمان في الامتحانات بقى التهييس وقلة التركيز بيبقوا عاليين شوية اتنين تلاتة دا في المذاكرة بس الكلام ده مش طبعا في الفيس بوك ولا التي في والأغاني ….. الخ

طبعا الكلام ده عن الطلاب العاديين اللي زي حلاتي ، الكلام ده مش للطلاب الدحاحين اطلاقا

ولكل الطلاب المطحونين بهديلهم الأغنية دي أنا قريتها وعجبتني

ليلي نهاري بنااااااام يا حبيبي لا ملامة حبيبي واعمل ايه

ليلي نهاري مخنوقة يا حبيبي والكتاب عايزة ارميه

مش عايزة انا اشوفك قصادي (يا كتاب)

ياريت امتحانك امتحان عادي

قدامك حياتي دي اصعب حياااااااااااة

يوم الامتحان يصبح العقل بتنجان

باي باي 🙂