يحيا حسني مبارك الأب الرئيس القائد العظيم البطل المحب لشعبه ووطنه .. آسفين ياريس …
مبارك قاد مصر لأجمل عصور الازدهار وبقينا في الصفوف الأولى بين الدول العظمى ..
مبارك عيش شعبه في منتهى الحريه والديموقراطيه كل واحد بيعبر عن رأيه بلا قيد أو شرط ..
مبارك رفع مستوى الشعب مبقاش في طبقيه وغني وفقير كل الشعب بقى واحد ..
مبارك حصلت في عهده أعظم الثورات التكنولوجيه والزراعيه والمعماريه والتعليميه و ………. الخ ..
من الآخر كده مبارك ونعم القائد ونعم الرئيس ونعم الأب …..علشان كده احنا آسفين ياريس بجد يعني آسفين …
سمعت ياريس الناس الي فرحانه بيك الي بتأيدك شوف بيقولوا علشك ايه ” الريس كرامته من كرامتنا ، استقرار مصر يتطلب وجود الريس ، الريس دا ابوكم وماحدش يعمل في ابوه كده ، الناس الي بتعارض دي كلهم عملاء ، الاجندات الخارجيه سيطرت على البلد ، المعارضين دول اخدوا 50 جنيه ووجبه كنتاكي ” اسمع ياريس اد ايه الناس بتحبك وبتدافع عنك وعيزاك تفضل ماتمشيش …
صدقت ياريس ؟؟!!
آنا آسفه علشان كدبت وقولت كده وانت أكتر العارفين إن الكداب بيروح النار مش بيروح مارينا ولا شرم ولا باريس حتى …
بما إني مش كدابه عايزه أقولك ياريس إنت دمرتنا إنت مش أب ولا أخ ولا قائد عظيم ولا قدوه لشعبك ربما تكون كده لحاشيتك و أعوانك لكنك مش كده لينا .. دا أكيد …
ياريس إنت بهدلتنا أوي أوي إنت شردت أسر وجوعت أطفال وهدمت بيوت وقتلت أرواح من غير وجه حق ..
ياريس إنت سرقت البلد وسلمتها لشويه حراميه ولصوص نهبوها معاك أكلوا الأخضر واليابس ..
ياريس إنت دمرت عقول ملايين الشباب لما سمحت إن سوق المخدرات يفتح ويلاقي سكته في البلد ..
ياريس إنت أنشأت جيل بحاله اسمه أطفال الشوارع جوعتهم وعريتهم ومرضتهم وموتهم في سكتك ..
ياريس إنت سديت ودانك وربطت لسانك وغميت عنيك وقفلت بابك في وشنا ..
ياريس إنت سرقت وطنك وبعت أرضك وضحيت بشعبك علشان تنضم للصفوه ..
ياريس إنت تعبت بلدك وتعبت شعبك إنت هديت حيلنا ياراجل ..
كنت عايز تعلى وأديك عليت بس المثل بيقول ماطار طير وارتفع إلا كما طار وقع ..
كنت عايز تبقى غني وادي جيبك اتملى بس المثل بيقول يروح المال ويبقى القرد على حاله ..
انا عايزه اقولك اوعى تصدقني واوعى تصدق اي حد يقولك غير كده في يوم وانا عارفه انك مش اهبل ومش مصدق مهو صوت الحق دائما يعلوا ونار الثوره لهيبها عالي ومنور والطريق الي قدامك كساه دم الشهداء لون أحمر يعني كل شيء واضح وظاهر ياريس ..
اتخيل بقى ياريس منظرك وانت بمنتهى العند وقلة الضمير شايف الي بتزعم انهم ولادك بيتسحلوا وبيتجروا ع الارض وبيتمسح بدمهم الشارع ، وشايف الي دبابتك هرست راسه و الي مات بسنجه والي مات بحجر ..
اتشفى ياريس واروي غليلك .. الكلاب الي اتحدوك أديك علمتهم الأدب ..
اتخيل منظرك انت او اتباعك او الي خولت لهم سلطة اشغال الشباب بيتفاوضوا مع مدرب اجنبى بالمليارات
أو الي بينظموا المهرجانات بشتى أنواعها وبيدفعوا فيها ملايين ، واتخيل وانت ماعندكش ذره رحمه بتشوف أطفال السرطان اتوقف علاجهم بسبب قلة الإعدادت و بيموتوا واحد ورا التاني ..
والابشع من كل دا النهارده اكتشف العالم كله ان ثروة سيادتك لا تقل عن 70 مليار دولار …
اتخيل منظرك وكلابك بيقولوا بأعلى أصواتهم إنه صاحب الضربة الجوية و قائد نصر اكتوبر المجيد
مهو لو انت صاحب النصر يبقى الشهداء الي ماتوا في جميع قطاعات الجيش يبقوا ايه ؟!!
سيادتك النصر دا نتيجه مجهود جماعي وخطه وتنظيم ودم ملايين الشهداء مش مجهود معاليك …
ها ياريس مش حان الوقت نتخلى شويه عن الانانية وتراعي بلدك حبيبك الي انت بتدعي انك افنيت عمرك فدا ليه ؟؟ ..
ايه ياريس قلبك ماحنش ولو لحظة لما شفت صور الغرقانين فى العبارات وسط المحيط ؟؟ ..
ماجربتش وماحستش بنار الاهالي الي الموت خطف ولادهم لما الموت خطف حفيدك من بين احضانك ؟؟
طب لو حسيت ولو للحظه ماعاقبتش ليه كل واحد كان سبب في ان ام تفقد ابنها ويضيع من بين احضانها في ثانيه
ولا ساعة ما دا بيحصل بيبقى كلب وراح ؟؟
مادمعيتش عينك على الشاب الي مثلوا بجثته في لبنان واخيرا بعد سنه ظهرت برائته وانه اتقتل ظلم ومافيش أي مطالبه بحقه !! ..
بأى حق جاي بتطلب نرحمك وانت ما رحمتناش يوم في رحلة العذاب والذل والاهانة ؟؟
بأى حق جاي بتطلب نعزلك بكرامة وانت ما حافظتش كرامتنا يوم ؟؟
بأى حق بيطلب أتباعك تخرج معزز مكرم وبشرف كإنك فعلا من الي افنوا اعمارهم في خدمة بلادهم !؟؟
بأى حق جاي بتطلب من الشباب الشريف في الميدان الإنسحاب والخنوع والتراجع عن الي بدأوه من ثورة غضب إنت السبب الاول والوحيد فيها ؟؟
سيدى الرئيس انت ماسمعتش ان كتر الضغط بيولد الانفجار ؟؟
ضغطتنا 30 سنه فانفجرنا وواضح انك مش هتقدر تتحمل تبعات الانفجار دا هذا الانفجار ومش هتقدر توقفه كمان ..
انت متخيل ياريس منظرنا وانت ماشي وسايبنا ؟؟
انت متخيل مقدار فرحتنا بانتصارنا على الذل والعبودية اللى عيشت فيها البلد والناس ؟؟
انت متخيل قد ايه هتبقى فرحة كل ام محروقه بنار ابنها اللى انت ماجبتلهاش حق دمه ؟؟
ارجوك انت بقه كفاية لحد كده كفاية عند وانانية ، كفاية نهب ف اموالنا ، كفايه دم الشعب ، كفاية بقى ارحم من ف الارض يرحمك من فى السماء ويمكن تلاقى حد يرحمك فى مصر ..
كفايه لحد كده ماعادش في شيء تخبيه ، لا عاد ينفع تخبي جرايمك ولا عاد ينفع تخبي بلاويك الي عملتها في البلد ، فات الوقت على تدارك الموقف الي انت بتعمله دلوقتي ، فات الوقت على انك تداري ملفات فسادك ، فات الوقت ياريس …
خليك فاكر ياريس ان فاقد الشئ لا يعطيه والعزا عمره ما اتعمل في قاعه افراح …
انت مارحمتش علشان تترحم ، انت ما اكرمتش علشان تكرم ..
وبعدين ياريس الي انت مش راضي تعمله لنفسك ماحدش هيعمله بالنيابه عنك ارحم نفسك وعز نفسك واخرج بكرامتك ..
ووعد علينا نكسر وراك 50 قله .. بس انت ارحل بقـــــــــــــــــــــــــــــــــــــــــــــــى …
اترك تعليقاً