نصـــــــــــــــــــــــــــــــــــــــــــــــــــــــــــــــــــر قريب يـــــــــــــــــــــــــــــــــــــــــــــــــــــــــــــــــــارب
بعيدا عن أرض الوطن نعم هذه حقيقه وقليل أن نقول أن قلوبنا مع من هناك ، حتى وإن لم نكن شهود عيان على ثوره الحريه والغضب فإن دعائنا يرتفع إلى السماء أن انصر يارب شعبا ينادي بالحياه …
في بقى شويه حجات كده ترفع الضغط سواء كنت خارج مصر أو داخل مصر بس أي حمار لو سمع الكلام مش هيصدقه دا أكيد ، أولا الكلام المطروح حول رؤوس الثوره ..
طلع أسامه سرايا للي مايعرفوش فهو واحد من ضمن الي – واكلينها والعه – بيقول إن الإخوان هم السبب والمحرضين على هذا الغضب .. أنا بس حابه اقوله جرا ايه يا باشا انت بتتكلم وانت صاحي ولا مغيب ولا ايه نظام حضرتك انا متأكده انه عارف كويس أوي إن الثوره دي بالذات ثوره شعبيه قام بيها الشعب من أجل الشعب ومن أجل الشعب فقط ، لو أي حد دخل على الفيس بوك هيعرف إن الحملات الي بدأت في الدعوه للثوره حملات شبابيه ، حملات كل الناس الي فيها لا ليهم علاقه بسياسه ولا بأحزاب ولا بجماعات ..
لكل بقى الي بيقول زي أسامه كده برضو ليه نفس الكلام – صبااااااااااااااااااااااااح الفل – الدماغ الي سيادتك عاملها ايه ، احنا وأنا بتكلم عن كل الشباب عندنا وعي كافي ودا طبيعي في ظل الانفتاح العالمي والثوره التكنولوجيه بقى عندنا وعي كافي بالأحداث داخل وخارج مصر ، كبرنا وأصبح عندنا رأي وقدره على التعبير عن رأينا ، مش محتاجين حد يسخرنا ولا حد يحركنا ويقولنا نعمل ايه علشان نجيب حقوقنا ، بقينا عارفين كويس أوي من أين تؤكل الكتف ، لكن الظاهر ان لسه في ناس مغيبه ذهنيا وماتعرفش ان كل ده حصل أو فايقين بس بيستعبطوا وفي كلا الحالتين هم الخسرانين لأن آخر تهاونهم ادى إلى ثوره غاضبه حانقه إن شاء الله هتاكل الأخضر واليابس …
كمان لكل الي بيقولوا إن دا تخطيط من المعارضه نقطه مهمه أوي نفسي يعرفوها ، زي ماقلت الحمله انتشرت على الفيس بوك الي بيدخله معارضين واخوان وأمريكان و كمان بيدخله أطفال وشباب وتاني برضو لا يعرفوا معارضات ولا احزاب ، الي خرج في الثوره دي أطفال وشباب ونساء ورجال كهل ، الثوره دي فيها عاطلين عن العمل و فيها عمال وفيها أساتذه وفيها موظفين حكومه وفيها مديرين وفيها زبالين وفيها بياع كشري وفيها بياع لحمه .. باختصار فيها جميع فئات الشعب لإنها ثوره شعب ، شعب معارض للحكومه وللحزب الحاكم .. لا نعلش ثواني دا شعب معارض للرئيس ذاته ، مش دا برضو نفس طلب المعارضه وباقي الاحزاب الي هم أصلا جزء من الشعب ، طب وماله لو اتفقنا في نقطه من أهم النقط – مش عايزين الريس – يبقى كده احنا معارضه ماشي احنا معارضه احنا شعب كله معارض أصلا المهم اننا بضرو – مش عايزين الريس – كفايه كده بقى …
كلام تاني غريب عجيب وتحته ميه خط أحمر طلع الرئيس مبارك قالك ايه [ هذه التظاهرات ما كان لها أن تتم لولا مساحة حرية التعبير التي أتيحت ] يعني والله نو كومنت – زغزغيني يا فنله – هما كانوا مشربينه ايه قبل ما يطلع ولا الحمار الي كتبله الخطاب العظيم دا كان فاكر انه بيخاطب حمير زيه ولا كلهم عاملين نفس الدماغ أنا عايزه بس اقولهم يغيروا الديلر الي بيتاعملوا معاه أصله واضح كده إن الصنف مش نضيف ، أنا فعلا مش بهزر بس دا فعلا كلام ناس مساطيل مهو مفيش واحد عاقل يقطع الانترنت والموبايلات و يقولي أن دي حريه ، حريه دي تبقى خالتك يا حبيبي ، فوقوا بقى الشعب زهق العب طلعت عينه الشعب فـــــــــــــاض بيه خلاص كفايه لحد كده ، الي حصل ده يا فخامه الرئيس مش دليل على حريه انت بتضحك على نفسك وتقول انها موجوده ، الي حصل ده دليل على انفجار من الكبت والقمع والذل والهوان والاستهزاء بعقول الناس و أرواحهم ، الناس بتقولك كفايه عليك كده كفايه عليك 30 سنه وكفايه علينا احنا كمان تعبنا …
وبعدين ماحدش يضحك على نفسه الي ماتعملش طوووووووووول 30 سنه مش هيتعمل دلوقتي الي عايز يعمل حاجه مش هيستنى لما دراعه تتلوي ، البلد بقالها 30 سنه على الحال ده ، ايه في خلال السنين دي ماكانش ينفع احوالها تتصلح و هي في عز ازدهارها ولا دلوقتي بقى حلو علشان الاصلاحات تتم ولا الناس بتتثبت زي العاده و نلاقي في النهايه ان – كلام الليل مدهون بزبده يطلع عليه النهار يسيح – يعني ننيم الشعب ونشيل الحكومه نروح عاملين ايه مهديين الشعب وعقبال بقى ما الحكومه الجديده تتشكل وعقبال ما تثبت نفسها وتوضح أهدافها يكون ربنا حلها و اخدنا ، عذرا لكن احنا تفكيرنا أعلى من كده بكتير ، حتى الأطفال دلوقتي مابقاش يضحك عليهم ودا كلام لا يرقى لمستوى عقول الأطفال …
تاني هقول الملك فاروق كان قادر يقمع الانقلاب الي اتعمل عليه لكن حقنا للدماء وحتى لا يراق دم مواطن واحد خرج وساب حكمه ومملكته متنازلا لابنه أحمد فؤاد عن الحكم الذي انتقل بلا أي أحقيه لجما ومنه لأنور ومنه لمبارك رغم أنه رسميا مازالت مصر تحت حكم الملك أحمد فؤاد ، بس مش هي دي النقطه المهم في الأمر إن الي خايف على شعبه وعايز مصلحته ماينزلش شرطه تضربه وتموته وتتعمد إصابته وبعدين نقول الشعب عنيف ليه ماهو من الي شايفه بيدافع عن نفسه وعن حقه ، الي عايز مصلحه شعبه ينفذ كل مطالبه ياخد بعضه من سكات وفي منتهى الهدوء ويرحل ، يسيب الشعب يتنفس ويرحل بعيدا عن شعب وأرض وحكم مصر …
يارب لاتولي علينا الظالم والجاهل .. اللهم ولي علينا خيارنا ولا تولي علينا شرارنا .. اللهم ولا تولي علينا من لايخافك فينا ولا يرحمنا يارب العالمين
اترك تعليقاً