مش ضد الحكومه ولا مع الثوره

إذا الشعب يوما أراد الحياه فلا بد أن يستجيب القدر

طب مهو الشعب عايز الحياه لكن فين هي استجابه القدر ؟؟

الحكايه مش مستاهله نسال السؤال ده لإنها أبسط من كده شعبنا عمره ماكان عايز الحياه شعبنا ( إمعه ) بيجري ورا كل واحد بيجري ويهتف ورا كل واحد بيهتف وهو مش عارف بيقول ايه ولا رايح على فين بس مش علشان كده ما وصلتش استجابه القدر لاااااااا .. أصل الحكايه أكبر من كده …

[ من مفاسد هذه الحضارة أنها تسمّي الاحتيال ذكاءً, والانحلال حرية،والرذيلة فنّاً، والاستغلال معونة ] د. مصطفى السباعي

هي دي ببساطه الحكايه لما معظم الشعب يبقوا كدابين ومنافقين ولصوص وبيحللوا الحرام ويحرموا الحلال يبقى أنهي حياه دي الي بيطالبوا بيها حياه الجشع والطمع والرشوه و الانحلال !! صحيح في ناس كويسه زي ما في ناس فاسده بس زي ما كانوا بيقولوا دايما الخير بيخص والشر بيعم .. الحكايه هنا مش حكايه خير ولا شر الحكايه ان الحياه الي بيطالب بيها شعب هو دا منهجه وسلوكه حياه باطله ..

عايزين نغير القيادات طب وبعدين ماهو الشعب لسه باقي ، لما نغير الرئيس والوزراء ونلغي الدستور هل في سكتنا هنغير الشعب كمان مهو ربنا قال { وإذا أردنا أن نهلك قريه أمرنا مترفيها ففسقوا فيها فحق عليها القول فدمرناها تدميرا } مهو مش معنى إن الحاكم وحش نبقى وحشين زيه وتبقى هي دي حجة البليد الي معظم الشعب بيتحجج بيها ، طيب ماهو في ناس لسه كويسه رغم إن الحاكم وحش ليه مابقوش وحشين زيه وانتهجوا نهجه ؟! وبعدين مهو بالعقل كده واحد بيبني كبريه ايه الي يجبرني أدخله ماحدش ضربني على إيدي وربنا خالقلي عقل أفكر بيه ، هو دا الي ربنا بيقوله ييجي رجل الأعمال يبني ملهى ليلي يروح ييجي المواطن يدخل ويسكر ويعيش حياته ، سواء فسرناها على ان المترف بيرتكب الفسق هو بذاته ظاو فسرناها على ان المترف بيصنع ما يؤدي لفسق الأهالي في كلا الحالتين وقع الفسق وحق الدمار …

للأسف احنا شعب ماعندوش أصلا مبدأ راسخ ولا عقيده قويه شعب طول عمره خانع مش علشان مابيثورش على الحاكم لا دا علشان مابيثورش على نفسه طول عمره يدور على أعفن صفيحه زباله و ينام جنبها طول عمره راضي يعيش في الزباله بغض النظرر بقى عن مين صنع مقالب الزباله دي .. مش هتفرق كتير كل الأطراف مشاركه وكل الأطراف لازم تعمل حمله نضافه ولازم كل واحد يبدأ بنفسه ينضف نفسه وأسرته وبيته وجيرانه وعمارته والشارع والحي …………. الخ، ساعتها بس يبقى لينا الحق نطالب بالتغيير وبقلب جامد علشان ربنا قال {إن الله لا يغير ما بقوم حتى يغيروا ما بأنفسهم }  …

وبعدين مهو احنا لو بصينا شويه على الي احنا فيه هنلاقيه من صنع ادينا زي ما ربنا قال { ظهر الفساد في البر والبحر بما كسبت أيدي الناس ليذيقهم بعض الذي عملوا لعلهم يرجعون } الفساد الي البني آدم بيمارسه في الأرض السرقه والنهب والنصب والكدب والنفاق والغش وكل أوجه الفساد الخاصه والعامه بيحصد هو تبعاته بكل شكل حاكم جائر أمراض وقحط وجدب وآلام وهموم وكل دا ومن رحمه ربنا مش جزاء لكل الي الانسان بيعمله لا دا جزء من الي بيعمله من رحمه الله بعباده انه مايخسفش بيهم الارض { وكذلك أخذ ربك إذا أخذ القرى وهي ظالمه إن أخذه لأليم شديد } …

انا مش هنزل في مظاهرات ولا هنادي بتغيير القيادات ، بس مش معنى كده إني ضد الثوره ولا ضد الشعب ولا حتى ضد الحكومه ، و موقفي مش سلبيه مني ولا ضعف لكن من أوفى بعهده من الله وربنا قال { إن الله لا يغير مابقوم حتى يغيروا ما بأنفسهم } .. [ لايغير ما بقوم / حتى يغيروا ما بأنفسهم ] تغيير مقابل تغيير ، حتى يغيروا ما بأنفسهم …

تحياتي للثوار على أرض الوطن تمنيت لو كنت هناك ليس لأكون معكم لكن لأشهد يوم ولدت ثورتكم لكن انا مش معاكم …